Албанската опозиција бара одговор од власта дали Љупчо Палевски е вмешан во организацијата на случајот „Монструм“
Европскиот сојуз за промени денеска побара од власта одговор дали Љупчо Палевски, осомничениот за убиството на Вања Ѓорчевска од Скопје и Панче Жежовски од Велес, е вмешан во случајот „Монструм“, кој се однесува на убиствата кај Смилковското Езеро.
– Неодамнешните трагични случувања со убиството на 14-годишното девојче и 74-годишниот велешанец отвораат дополнителни сомнежи за делата што главниот осомничен за организацијата на делото, Љупчо Палевски, познат по прекарот Палчо, беше вклучен и во другите монтирани случаи. Кога министерот за внатрешни работи, Оливер Спасовски, изјави дека главниот осомничен кој го изврши убиството на Вања, како и неговите соработници, работеле за моќни антизападни центри, тогаш логично е да се сомневаме дека истите организатори на убиството на Вања се вмешани и во организацијата на случајот „Монструм” каде на грозоморен начин беа убиени пет млади момчиња. И сето тоа, во пресрет на верските празници, со цел преку меѓуетнички тензии да предизвикаат дестабилизација на општеството. Затоа, Европскиот сојуз за промени бара од Министерството за внатрешни работи и од правосудните истражни органи да излезат и јавно да ја информираат јавноста каде бил Љупчо Палевски – Палчо на 24 април 2012 година, денот кога се случи монтираниот случај „Монструм“? – прашуваат партиите од Европскиот сојуз за промени.
Од друга страна, додаваат, бараат МВР и Министерството за правда да не ја заморуваат јавноста со изјави во кои се објаснуваат постапките за екстрадиција, туку да го истражат и конкретно да го наведат денот кога ќе биде екстрадиран од Турција главниот осомничен за организирање на убиството на Вања и Панче.
Во коалицијата Европски сојуз за промени се партиите од албанската опозиција Демократско движење, Беса и Алтернатива.