Албанската министерка за Европа и надворешни работи, Елиса Спиропали, изјави дека е „апсолутно можно“ нејзината земја да стане членка на Европската Унија во 2030 година, објави Индекс.хр.

Спиропали денеска беше домаќин на шефот на хрватската дипломатија, Гордан Грлиќ Радман, во нејзината прва официјална посета, а фокусот на разговорот беа пристапните преговори на Албанија за членство во ЕУ.

„Да, мислам дека е апсолутно можно да влеземе во ЕУ во 2030 година. Работиме на тоа, тоа е нашата стратешка, национална цел“, рече Спиропали како одговор на новинарско прашање.

Таа потсети дека нејзината земја го отвори своето последно поглавје на 17 ноември и дека Тирана е целосно посветена на унапредување на процесот на реформи, со амбиција да ги затвори сите поглавја во 2027 година. Таа истакна дека Неделата на хрватската култура е отворена во Тирана истиот ден, додавајќи дека некои би рекле дека така испаднало случајно. Потоа таа на хрватски јазик рече:

„Ништо во политиката не е случајно“.

Зборувајќи за борбата против корупцијата, Спиропали истакна дека „кластерот за фундаментални права беше првиот што се отвори“ и дека ова покажува дека нивната политичка волја во врска со владеењето на правото, независноста на судството, судските реформи и градењето силни институции е непоколеблива

„Сериозни сме во врска со борбата против неказнивоста и спроведувањето на судските реформи. Ќе продолжиме по тој пат, сериозни сме во врска со сите поглавја од преговорите, особено кога станува збор за фундаменталните права, бидејќи ова е ‘рбетот на процесот на пристапување“, потврди министерката.

Таа, исто така, истакна дека владата вложува огромни напори за што поскоро успешно да го продолжи патот кон ЕУ, но дека и луѓето што ги поддржуваат придонесуваат за ова.

„Дури 92 проценти од Албанците го поддржуваат членството во ЕУ“, истакна министерката.

Спиропали рече дека Косово е траен приоритет за Албанија, а воедно и основа на стабилноста во регионот.

„Ние го охрабруваме дијалогот со Србија врз основа на принципот на еднаквост, реципроцитет и меѓусебно признавање. „Тоа е единствениот одржлив пат напред“, рече таа.

Таа истакна дека Албанија многу ја цени принципиелната поддршка на Хрватска за Косово, консолидацијата на државата и нејзиното меѓународно признавање и патот кон евроатлантската интеграција.ж