Констатирано е алармантно влошување на здравствената состојба на Бојан Јовановски – Боки 13. Предложен е оперативен третамн тотална гастректомија со езофаго-јејуно анастомоза, односно целосно отстранување на витален орган желудник, бидејќи врз пациентот терапевтскиот третман не е спроведуван, ниту реализиран, односно со ова медицинско иследување и наод се потврдува фактот дека осудениот Бојан Јовановски нема услови и можност да се лекува и да се третира во пенални затворски услови, информира правниот тим на Боки 13.

На Универзитетска клиника за гастрохепатологија вчера му била направена Горнодигестивна ендоскопија, Гастроскопија а наодот е рефериран и одобрен од стучниот колегиум на Клиниката.

Правниот тим на Јовановски посочува дека животот му е ставен во ризик бидејќи извесно е во секој момент да настане компликација која ќе биде фатална по неговиот живот.

Па наместо законита постапка имаме состојба на хазардерско постапување од страна на надлежните органи, а како влог е ставен животот на осудениот Бојан Јовановски! Оттука, потенцираме дека Основниот кривичен суд Скопје веќе цели четири месеци нема донесено правосилна одлука по барањето за прекин, постапка која по својот карактер и итна, а истовремено судот не презема никакви дејствија и не одлучува по жалбената постапка ниту во разумен рок, иако до судот навремено се доставени сите овие медицински докази и од страна на одбраната се преземени сите расположливи средства предвидени со закон, но за жал, негативната тенденција и тортура кон осудениот Боја Јовановски е поголема од сите реални факти и законски основи за уважување на барањето за прекин на издржување на казна затвор. Воедно ја информираме јавноста дека на ден 01.02.2023 година поднесено е барање за прекин и до директорот на Управата за извршување на санкциите, кој е суверен во својата одлука и не е врзан со одлуката на судот, но и од овој орган нема се уште одлука!, се вели во соопштението.

Потенцираат дека агонијата на Јовановски трае повеќе од седум месеци и велат дека е предмет на нечовечно однесување, истиот се третира како експериментален предмет, а не како човек.

Врз осудениот Бојан Јовановски веќе несомнено се спроведува тортура од највисок степен и му се нарушуваат сите загарантирани човекови права согласно Устав и согласно Европската конвеција за заштита на човекови права, додаваат од правниот тим.

Според нив, ваквото институционално постапување и директно изживување од позиција на моќ е незапаметено во поновата историја. Велат дека и покрај предвремените предупредувања и барања за прекин дека доколку Боки 13 не се лекува и третира согласно специјалистичките извештаи и конзилијарните мислења на десетици специјалисти и суб-специјалисти, ќе дојде до крајна и непосакувана последица – операција со висок ризик на смртност и настанување на траен инвалидитет.

После сето ова веруваме, но не сме убедени, дека за Бојан Јовановски еднакво важи загарантираното Уставно начело на неповредливост на физичкиот и психичкиот интегритет, како и за сите други граѓани во Р.С.Македонија. Оттука, јавно прашуваме на кого му одговара да настанат смртоносни последици по животот на осудениот Бојан Јовановски? Дали системот свесно, организирано и координирано, секојдневно и стихијно го убива Бојан Јовановски? Кој ќе понесе одговорност за веќе настанатите последици по здравјето и животот на Бојан Јовановски?, се наведува во соопштението.

Апелираат дека не се откажуваат од намерата за правдата да добие светлост на денот и оти не се плашат од директните и индиректните закани, бидејќи како што велат, бранејќи ја правдата на Боки 13 ја бранат законитоста, а потоа и правната стабилност која е сериозно разнишана.