Поради недостигот на дожд и сè поголемата побарувачка за вода што се заканува да ги исцрпи резервите во Велика Британија, нова регулатива со која се забранува употребата на градинарски црева ќе стапи на сила на 22 јули 2025 година.

Новото правило важи во Глочестершир, Оксфордшир, Беркшир и Вилтшир, окрузите каде што се наоѓа имотот на кралот Чарлс Трети (76) во Глостершир Хајгроув и поранешната резиденција на кралицата Камила (78), Реј Мил Хаус. Компанијата за вода „Темс Вотер“ вели дека привременото ограничување ќе влијае на областите со поштенски кодови што почнуваат со OX, GL, SN, RG4, RG8 и RG9 – GL и SN се поштенските кодови на руралниот имот на Чарлс и Камила. Од друга страна, Аделаида Котиџ, имотот на принцот Вилијам и Кејт Мидлтон, принцезата од Велс, беше поштеден, иако се наоѓа во Беркшир, бидејќи има поштенски код SL.

Забраната вклучува употреба на градинарски црева за активности како што се наводнување на градината, миење автомобили или полнење базени. Луѓето кои користат градинарско црево во текот на забраната може да очекуваат казни до 1.000 фунти (околу 1.156 евра).

Како самопрогласен екологист, кралот Чарлс Трети речиси сигурно ќе се придржува до новото правило и ќе ги одржува своите градини со канти за залевање и слично. Тоа е она што го тврди 71-годишната Џоан Меклауд од Вилтшир, која живее во близина на кралската резиденција на кралот Чарлс.

„Секогаш сме имале три буриња со вода за собирање дождовница и ќе продолжиме да ја користиме таа вода во кантите за залевање додека не се потроши. Едноставно штедиме колку што можеме повеќе вода за тоа време.“