Пратеникот за движењето Самоопределување Грамос Агушоли вели дека Косово се залага за конечен договор со взаемно признавање, но дека тоа не зависи од Приштина, наведувајќи дека ЗСО не е прифатливо доколку е во спротивност со Уставот, пренесуваат косовските медиуми.

Тој додаде дека Србија „го прекршува договорот лобирајќи против Косово“.

„Дефинитивно верувам во искреноста на американските сенатори и нивната желба да се реши ова прашање како што велат, но Србија до сега ја прекрши секоја точка од договорот, силно лобирајќи во однос на суверенитетот и територијалниот интегритет, како и против членството на Косово во меѓународните организации“, рече Агушоли.

Според него, Косово е подготвено за договор со взаемно признавање, но тоа не зависи од Приштина, бидејќи Србија, вели, има деструктивен пристап во дијалогот.

„Она што досега го имавме од дијалогот со српската страна е деструктивен пристап и сценарија што го дестабилизираа северот на земјата преку криминални банди инсталирани директно од официјален Белград“, тврди Агушоли.

За Заедницата на српски општини, тој вели дека доколку е во спротивност со Уставот на Косово и нејзиното формирање не е прифатливо.