Првата ѕвезда на Милвоки Бакс, Јанис Адетокумбо, направи голем чекор надвор од НБА-паркетите и влезе во светот на фудбалот, откако стана ко-сопственик на женскиот фудбалски клуб Челси.

Грчкиот кошаркар, кој има 31 година, не го криеше задоволството од новиот ангажман и јавно истакна дека сака да даде свој придонес во развојот и унапредувањето на женскиот спорт.

„Реномето и историјата на Челси зборуваат сами за себе. Чест и задоволство ми е што ќе бидам дел од иднината на клубот и што ќе помогнам во неговиот понатамошен раст, како и во јакнењето на влијанието на женските спортови. Ова е приказна за визија, традиција и подигање на спортот на повисоко ниво. Напред Челси“, порача Адетокумбо

Адетокумбо има блескава НБА кариера зад себе, со шампионска титула и признание за МВП на финалето во 2021 година, како и две награди за најкорисен играч во регуларниот дел од сезоната. Во исто време, женскиот тим на Челси моментално ја зазема третата позиција на табелата во англиското првенство со 27 освоени бодови.