Седумдесет и седумгодишен жител на Виница бил измамен за сума од 7.000 евра од лице кое се претставило како лекар, соопшти МВР.

– На 8 јануари 2026 година во 17:30 часот во ОВР Виница, 77-годишен жител на Виница пријавил дека бил измамен од едно лице за сума од над 430.000 денари. Според пријавеното, претходно во текот на денот лицето му се јавило, се претставило како лекар и го известило дека неговата ќерка е во болница поради скршеница на нога за која било потребно да се изврши операција со вградување на шипки – соопшти полицијата.

Според пријавеното, лажниот лекар побарал пари за интервенцијата, по што оштетениот, во неколку наврати, ги однел парите на договорено место. Подоцна, откако се вратил дома, му се јавила неговата ќерка, по што сфатил дека станува збор за измама.