Фестивалот на аналогна фотографија „Зрно“ на 13 и 14 октомври активно учествува на меѓународниот фестивал посветен на аналогна фотографија, филм и музика „Аналогманија“ во Темишвар, Романија.

Учеството на „Аналогманија“ е дел од пошироките активности на „Зрно“ за промовирање и ширење на аналогната култура во Европа, а „Зрно“ е препознат ширум Европа како значаен промотор на аналогниот пристап во современата уметност и станува јадро на алтернативната фотографија во Европа.

На фестивалот „Аналогманија“, „Зрно“ претставува неколку изложби: „Исчезнување во пејзажот“ – авторска изложба на Сара Сасани (Иран); „Гора – стебла“ – авторска изложба на Стиг Марлон Вестон (Норвешка); „Ева Ристиќ“ и „Време за чај“ – авторска изложба на Емилија Сандиќ (Србија); „Воскреснување на старите мајстори: оживеани негативи од браќата Манаки“ – изложба на „Зрно“ во соработка со Државниот архив на Македонија – Сашо Алушевски.

Во рамки на фестивалот, Сашо Алушевски ќе претстави неколку дела на македонските пионери на фотографијата и филмот – браќата Манаки, отпечатени на традиционален начин, со благородните историски фотографски техники – Ван Дајк и Цијанотипија.

На фестивалот во Темишвар е поставена и изложбата „Sehschärfenbestimmung“ (Корекција на диоптријата) со 60 уметнички пристапи кон аналогната фотографија. Во организација на „galerie.guerilla“ од Виена и „Зрно“, оваа изложба претставува разновиден спектар на креативни процеси засновани врз аналогни техники и естетики. Шеесет уметници, повеќето од Европа, се претставени со внимателно избрани дела. Изложбата нуди богат мозаик на идеи, концепти и визуелни истражувања, охрабрувајќи ги посетителите да се поврзат со визијата на секој автор.

Меѓу учесниците на изложбата се и повеќе македонски автори: Ангела Грозданов, Анѓела Танчевска, Филип Ицовски, Ивана Цветаноска, Јелена Велинова, Кети Талевска Бакревска, Мартина Павлоска, Сара Ислам и Сашо Алушевски.

Тимот на „Зрно“ во соработка со Фото клуб „Ирис“ во Темишвар организира и две работилници: Емилија Сандиќ – „Мордансаж техника“ на 13 октомври; и Мартина Павлоска – „Креативна игра со полароид фотографија“ на 14 октомври.