По поразот на Србија од Албанија, познатиот фудбалски аналитичар Раде Богдановиќ испрати жестоки критики на сметка на сега веќе поранешниот селектор на „Орлите“, Драган Стојковиќ – Пикси. Според него, состојбата во репрезентацијата не е изненадување за оние кои подолго време ја следат српската репрезентативна сцена.

„До оваа ситуација дојдовме со долгогодишно неработење и одење во погрешна насока. Ова не е изненадување за луѓето кои ја следат репрезентацијата. Играта ни е лоша веќе долго време, уште од Светското првенство па сè до денес. Зошто селекторот не воспостави систем на игра?“, се прашува Богдановиќ.

Тој исто така истакна дека Пикси не бил подготвен да прифати критики, и покрај тоа што имал поддршка.

„Неговата плата во Сојузот беше еднаква на платите на 70 хирурзи од Првата хируршка клиника во Клиничкиот центар, а тоа е синоним за квалитет. Затоа мора да биде отворен за критика. Преку репрезентацијата поминаа огромен број фудбалери, толку многу што некои веќе ги имам заборавено.“, порача Богдановиќ.

Според последните најави од Србија фаворит за наследник на Пикси е актуелниот тренер на Црвена Звезда, Владан Милојевиќ.

Преземено од: Спорт.ком.мк