Украинскиот претседател Володимир Зеленски предупреди дека Русија подготвува нов масовен ракетен напад кој, според разузнавачките информации, би можел да се случи во следните 48 часа. Во своето вечерно обраќање, Зеленски ги повика граѓаните да ги следат предупредувањата за опасност од воздух, пишува „Украинска правда“.

„Нашите разузнавачки податоци, како и информациите што ги добиваме од нашите партнери, потврдуваат дека Русите подготвиле ракети за нов масовен напад. Тоа би можело да се случи уште денес, а според прелиминарните информации, тоа е можно во следните 48 часа. Ве молиме бидете безбедни и следете ги предупредувањата за опасност од воздух“, рече Зеленски.

Нова мобилизација за есен

Зеленски, исто така, објави дека, според разузнавачките служби, Русија подготвува нов бран мобилизација за есен. Тој објасни дека на Русија ѝ се потребни повеќе војници за планираното засилување на нападот.

„Русите во моментов губат повеќе војници на бојното поле отколку што можат да регрутираат, но Путин сè уште планира да ги интензивира нападите и да ја прошири оваа војна. Му требаат повеќе Руси за да испраќаат напади. Мораме однапред да се одбраниме од тоа на сите нивоа: на фронтот, долготрајни санкции, напади со среден дострел, дипломатија и, секако, соработка со сите што можат да поддржат живот и да го доближат мирот“, рече украинскиот претседател.

Напад врз регионот Киев

Предупредувањето на претседателот Зеленски следеше по денешниот руски ракетен напад. Во 11:25 часот, украинските воздухопловни сили издадоа предупредување за заканата од балистичко оружје од север, по што беа забележани брзи воздушни цели кон регионот Киев и главниот град. Воздушната одбрана пресретна една руска балистичка ракета, додека две го погодија регионот.

Според подоцнежните информации, погодено е стрелиштето, каде што се одржувал состанок на производители на оружје. До 15 часот беше потврдено дека 10 лица загинале во нападот и дека околу 100 се ранети. Властите покренаа две кривични постапки.

Десетмина загинати и околу 100 повредени луѓе во руски ракетен напaд кај Киев

Потребата од системи „Патриот“

Во својот говор, Зеленски уште еднаш нагласи дека набавката на ракети за системот „Патриот“ е апсолутен приоритет. Тој нагласи дека ова се единствените системи што можат да пресретнат руски балистички ракети.