Заврши реконструкцијата на железничката обиколница на Скопје на делницата Драчево – Илинден, со што товарните возови наскоро ќе бидат пренасочени надвор од градското подрачје. Со оваа инфраструктурна промена се очекува побрз товарен железнички сообраќај, подобра организација на транспортот и намалување на загадувањето во главниот град.
Вицепремиерот и министер за транспорт Александар Николоски, заедно со директорот на ЈП Железници Инфраструктура Синиша Ивановски, извршија увид и тест-возење по обновената пруга.

-Со оваа железничка обиколница товарните возови повеќе нема да минуваат низ Скопје. Очекуваме по завршувањето на тест-периодот и техничкиот прием, за околу дваесетина дена делницата да биде ставена во целосна функција за карго-сообраќај – изјави Николоски.

Според него, проектот ќе придонесе за намалување на загадувањето, но и за подобрување на протокот на стока по Коридорот 10, што треба да овозможи побрз транспорт, повеќе железнички композиции и подобри услови за стопанството.

Николоски најави и дека најдоцна до 1 септември треба да започне со работа и првата линија на Градскиот воз. Таа ќе сообраќа на релација Зелениково – Драчево – центарот на Скопје, со што ќе се направи првиот чекор кон развој на приградскиот железнички превоз во главниот град.

Николоски: Возачите се прифатени од Брисел како професионалци