Обдукцијата на 45-те жртви од трагичната несреќа која пред два дена се случи на автопатот Струма во Бугарија заврши, потврдува за „Слободен печат“ директорот на Институтот за судска медицина, доктор Александар Станков. Тој заедно со двајца колеги од Скопје, им асистираа на бугарските вештаци во вршењето на обдукциите.

Станков информира дека се уште не е пристигнат ДНК материјалот од семејствата на починатите кој се зема на Институтот за судска медицина во Скопје, а кој ќе помогне да се идентификуваат лицата. Главниот обвинител на Република Бугарија, Иван Гешев заедно со колеги денеска се очекува во Скопје да пристигне и да поднесе барање за правна помош од Обвинителството во Македонија. Бугарските обвинители ќе преземат ДНК профили од роднините на загинатите, кои потоа ќе се однесат во Бугарија, за да се споредат со оние на жртвите. Поради степенот на изгорениците, ДНК анализата е единствениот начин за да се утврди идентитетот на настраданите.

– Завршија сите 45 обдукции. Не е пристигнат уште ДНК материјалот од Скопје за да се направи споредба. Идентификацијата на жртвите уште не е завршена, а откако тоа ќе се заврши, државата ќе го организира транспортот за враќање во земјата, ни рече доктор Станков.