Најпрво укажуваме дека директорот Филип Андов раководи со институција – затвор, а не со логор. Тоа би значело дека сите права кои им следуваат на затворениците мора и им се овозможени, согласно законите и правилниците на затворот, а донесени од законодавецот, Собранието односно Министерството за правда, реагираат од Казнено-поправната установа „Скопје“ по вчерашната прес-конференција на портпаролот на ВМРО-ДПМНЕ, Наум Стоилковски кој обвини дека уште еден затвореник избегал од затворот Скопје во Шуто Оризари.

Во соопштението од Затворот „Скопје“ посочуваат дека за конкретниот случај што го споменува Сотилковски, важно е да се спомене дека избеганиот затвореник не прескокнувал ѕидови, кршел врати или некој го пуштил да излезе.

Станува збор за осуденик кој претходно користел слободни викенди и се враќал, лице кое имал примарно однесување и треба да издржи уште 5 месеци казна затвор. Тој обавувал работни обврски во рамките на затворот. Командирот на смена забележал дека го нема при пребројувањето – по што веднаш ја алармирал полицијата и по него се трага. Од страна на затворот е постапено согласно законските рамки. Откако не се појавил во затворот, известена е полицијата која трага по затвореникот. По неговото пронаоѓање, тој ќе биде сместен во друг дел на затворот, бидејќи Правилникот налага, само во случаи кога одреден затвореник ќе ги прекрши правилата – тогаш да му бидат ускратени привилегии/права. КПУ Затвор Скопје е установа од полуотворен вид каде затвор издржуваат примарни осудени лица со казна затвор од 3 години односно повтореници до 1 година. Во тој контекст сите осудени лица користат бројни погодности како што се домашно отсуство, годишни одмори и слободно движење надвор од установата, а се во насока за почести контакти со семејствата, како и други органи како што се Агенција за вработување, Центар за социјални работи, се посочува во соопштението.

Портпаролот на ВМРО-ДПМНЕ вчера реагираше дека ова повеќе не е случајност, туку системски, ако не и намерни пропусти. Побара оставки и одговорност од директорот на затворот во Шуто Оризари и министерот за правда Никола Тупанчевски.