Онлајн платформата за нарачка и достава на храна „КликниЈади“ од вчеравечер запре со работа, известувајќи ги корисниците дека прекинот е „привремен“, но и „на неопределен временски период“.

„Почитувани корисници, нашата услуга за достава ќе биде привремено прекината од денес, за неопределен временски период. Ви благодариме на разбирањето“, пишува во кусата порака до муштериите на веб-страницата на „КликниЈади“.

Ова се случува по десет години откако „КликниЈади“ започна со работа, како една од првите платформи-агрегатори на ресторани за нарачка на храна во Скопје и Македонија. Во последните години, драстично се засили конкуренцијата во бизнисот со достава на храна кај нас, а на пазарот влегоа и големи „играчи“ од странство, како „Волт“.