Нов советник на генералниот секретар на СДСМ, Љупчо Николовски ќе биде Замир Мехмети. Тој самиот ја објави информацијата на својот профил на Фејсбук.

Замир Мехмети беше дел од Шарената револуција, а е брат на поранешната пратеничка на ДУИ, Ермира Мехмети.

– Со задоволство ја прифатив поканата од генералниот секретар на СДСМ, Љупчо Николовски, да се вклучам како советник во неговиот тим кој ќе има задача да го подобри функционирањето и да придонесе за отварање и демократизација на партијата и на општеството во целост – пишува Мехмети на неговиот профил на Фејсбук.

Тој вели дека при неговото одлучување, тргнал од премисата дека секоја единка треба да ја прифати одговорноста и своите капацитети максимално да ги вложи за да придонесе во идеите во кои верува.

– Јас бескомпромисно верувам во концептот „едно општество за сите“ и со прифаќањето на оваа понуда ја превземам обврската лично и директно да учествувам во зајакнување, растење и развивање на оваа, за мене, револуционерна идеја. Во меѓувреме, како и досега, останувам посветен на принципите за правда, еднаквост и слобода, како главни постулати на секое праведно општество. Борбата продолжува! – вели Мехмети.