По 50 евра казна ќе заработат граѓаните кои непрописно ги паркираат своите возила на јавни и зелени површини на територијата на општина Центар.

Од Општината информираа дека нивните комуналните инспектори и редари спроведуваат засилени контроли на возилата и дека на секое неправилно паркирано возило ќе биде оставено известување за сторен прекршок, со предвидена казна од 50 евра во денарска противвредност, согласно Законот за комунални дејности и Одлуката за комунален ред на Општина Центар.

Сторителот на прекршокот е должен веднаш да го подигне прекршочниот платен налог во барака 6А и како што потсетуваат од Центар, доколку казната се плати во рок од осум дена, сторителот ќе плати половина од износот. По истекот на рокот следува целосна наплата, односно се поведува прекршочна постапка пред надлежен суд.

Редот се спроведува доследно и без исклучоци. Жителите на Центар го бараат тоа од нас. Безбедноста на пешаците и заштитата на јавните и зелените површини ни се приоритет, порача градоначалникот Горан Герасимовски.

Општина Центар ги повикува граѓаните да ги почитуваат правилата и да придонесат за подобра урбана и животна средина.