За наградата „Пегаз“ за најдобар необјавен роман на годината пристигнаа 36 ракописи
На петтиот конкурс за наградата „Пегаз“, за најдобар необјавен роман на годината, што го организираат издавачката куќа „Арс Ламина“ и Фондацијата за унапредување и промоција на културните вредности „Славко Јаневски“, пристигнаа 36 ракописи.
Конкурсот беше отворен во мај и траеше до 30 септември 2023 година. Во периодот што следува, пристигнатите ракописи ќе ги оценува тричлена комисија, сочинета од двајца еминентни претставници од културната сфера и претставник од издавачката куќа „Арс Ламина“.
Наградата „Пегаз“ е откупна и се состои од паричен износ од 90.000 денари, статуетка и објавување на романот во посебна едиција. Добитникот на наградата ќе биде соопштен најдоцна до 29 декември 2023 година.
На минатогодишното издание на „Пегаз“ пристигнаа 38 ракописи, а за победнички беше избран романот „Зелениот дворец“ од писателот Сибо, кому му беше врачена наградата на посебна промотивна свеченост. Наградата е востановена и се доделува од 2019 година.
(Текстот е објавен во „Културен печат“ број 200, во печатеното издание на весникот „Слободен печат“ на 14-15.10.2023)