Јубилејното петто издание на „Скопски градски фестивал“, со возбудлива и исклучително квалитетна програма во организација на „Баги комуникации“, ќе се одржи во три фестивалски вечери, на 7, 9 и 15 мај.

Фестивалот ќе биде отворен на 7 мај во Камерната сала на Филхармонија со концерт на дуото „Роџерс и Харисон“, кое го сочинуваат двајца извонредни музичари, гитаристи со долгогодишно искуство на западноевропските сцени.

Истата вечер ќе настапи и во моментов најоригиналниот македонски рок-состав „Код 369“, кои доаѓаат од Битола, а нивниот прв албум насловен „Стадиуми на љубовта“, издаден за најголемата балканска дискографска куќа „Кроација рекордс“, наиде на неподелени позитивни реакции од музичката критика во Хрватска и во Словенија. Специјални гости на концертот на „Код 369“ ќе бидат пијанистот Бобан Мирковски и извонредната вокалистка Агни Авшар.

Втората вечер ќе се одржи на 9 мај во МКЦ (Дансинг сала), каде што ќе има три концерти. По повеќе од пет години, пред скопската и македонска публика ќе настапи еден од најдобрите македонски и балкански рок-состави „Бла-бла-бла“, предводен од харизматичниот лидер и автор со оригинален музички израз, Идриз Амети.

Концерт ќе одржи и Мухамед Ибрахими, кого го нарекуваат скриен гитарски бисер, скромен, но маестрален на сцена. Простор е оставен и за младата група „3rd Brigade“, а со изложба ќе се претстави Марга Рита.

Петтото издание на „Скопски градски фестивал“ ќе заврши на 15 мај, во Филхармонија (камерна сала), со концерт на Мијата (Наташа Мијат Крстевска), уникатна појава на македонската музичка сцена, како со препознатливиот музички израз, така и со оригиналните, театрални сценски настапи.

(Текстот е објавен во „Културен печат“ број 228, во печатеното издание на весникот „Слободен печат“ на 27-28.4.2024)