„Македонисимо“ на Симон Трпчески и пријателите со голем успех беше изведено со Софиската филхармонија
По балканската премиера на оркестарската верзија на проектот „Македонисимо“ на Симон Трпчески и пријателите, што на сцената на македонските филхармоничари неодамна ја изведоа со Камерниот оркестар „Ајга“ и диригентката Ана Спасовска, исклучителното дело изнедрено од македонската традиционална музика низ перото на композиторот Панде Шахов, на 25 април ја продолжи својата благородна мисија на сцената на салата „Бугарија“ во бугарската престолнина, со еден од водечките оркестри во регионов, Софиската филхармонија.
Како што соопшти „КултурОп“, квинтетот „Македонисимо“ настапи во оригиналниот состав: Симон Трпчески на пијано, Хидан Мамудов на кларинет, саксофон и кавал, Александар Краповски на виолина, Александар Сомов на виолончело и Влатко Нушев на удиралки, заедно со Софиската филхармонија, под палката на исклучителната млада диригентка Ана Спасовска, која го имаше своето деби со познатиот бугарски оркестар.
Долготрајните аплаузи од софиската публика биле наградени со три изведби на бис, а посебно одушевување предизвикало гостувањето на познатата бугарска певица Александра Борисова, која им се приклучила на музичарите на сцена.
Меѓу присутните биле и бугарскиот министер за култура, прославениот диригент Најден Тодоров, како и македонската амбасадорка во Бугарија, Агнеса Руси Поповска.
Следната квинтет-изведба на „Македонисимо“ е закажана за 9 јуни во Глазгов, Шкотска, како дел од резиденцијалниот циклус концерти на нашиот пијанист од светски глас Симон Трпчески со Кралскиот шкотски национален оркестар.
Симон Трпчески до крајот на овој дел од сезоната го очекуваат и редовните концертни гостувања во Соединетите Американски Држави, Велика Британија и Германија.