Новата книга од серијата криминалистички романи на авторот Анде Јанков со наслов „Кобајаши Мару“ беше промовирана на неодамнешниот Саем на книга во Скопје. Станува збор за петти роман на Јанков, а четврти од серијалот за инспекторот Виктор Николов.

– Под влијание на лепеза светски книжевници, почнувајќи од Ју Несбе, преку асимилација на интуитивниот дијалог на Венко Андоновски и од футуристичката логика на Орвел, но и пункција на луцидноста од античката фокализација, авторот го развива дејството како во темна комора, дел по дел, сѐ додека не ја индуцира целата слика при климаксот на романот – посочува рецензентката Јована Матевска Атанасова.

Серијалот за инспекторот Виктор Николов почна со романот „Виенски гамбит“, продолжи со „Сигурен ризик“ и „Само Бог простува“ и стигна до „Кобајаши Мару“. Сите романи се објавени од „Антолог“.

Авторот Анде Јанков е роден во Велес. Дипломирал на Економскиот факултет во Скопје во 2013 година, но книжевноста отсекогаш му била блиска, а се фокусира во областа на криминалистичките трилери.

(Текстот е објавен во „Културен печат“ број 228, во печатеното издание на весникот „Слободен печат“ на 27-28.4.2024)