Основното јавно обвинителство Скопје поднесе обвинение против 59-годишен маж за полов напад врз малолетник.

Како што наведуваат од обвинителството, инцидентот се случил на 24.08.2024 година во парк во скопската населба Чаир, кога обвинетиот почнал да го допира детето, кое во тој момент било помладо од 15 години, а тоа му ја фатило раката и се заканило дека ќе повика полиција.

Тогаш обвинетиот се обидел да избега и да се скрие во влез од зграда. Детето ја затворило вратата од влезот и повикало полиција која го привела обвинетиот.

„За обезбедување на обвинетиот во текот на постапката на сила се мерки на претпазливост определени од судијата на претходна постапка од Основниот кривичен суд Скопје, кои вклучуваат забрана за напуштање на живеалиште/престојувалиште, обврска за јавување кај надлежен државен орган, одземање на патна и друга исправа за преминувањe на државната граница и забрана за воспоставување контакт со оштетениот“, велат од обвинителството.