Поради екстремното загадување во Скопје, Министерството за животна средина и просторно планирање упати препораки до работодавците да ги ослободат од работни обврски бремените жени, лицата повозрасни од 60 години и лицата со хронични заболувања, по препорака на матичен лекар. Се препорачува и реорганизација на работното време за лицата кои работат на отворено, со ангажман во периодот од 11 до 17 часот, како и да не се организираат спортски и културни настани на отворено.

Истовремено, Министерството воведе вонредни мерки, кои вклучуваат вонредни контроли на фабрики, зголемени контроли на техничката исправност на возилата – особено на дизел и нерегистрирани возила, како и вонредни контроли на градилиштата. Воедно, стапува во сила и забрана за горење на отворено, а инсталациите со континуиран мониторинг се задолжени да обезбедат јавен пристап до измерените податоци.

ВИДЕО | Густа магла во главниот град: И утрово Скопје меѓу најзагадените градови во Европа

На повеќе мерни места во Скопје е надминат прагот на алармирање за суспендирани честички PM10. Според податоците од Државниот автоматски мониторинг систем за квалитет на амбиенталниот воздух и временската прогноза од Управата за хидрометеоролошки работи, во текот на два последователни дена е евидентирано надминување на дозволената вредност од 150 µg/m³.

Надминувањето на прагот е регистрирано на мерните места во Скопје – Центар, Гази Баба, Карпош, Лисиче и Ректорат, при што на одделни локации среднодневните концентрации на PM10 достигнуваат и над 250 µg/m³.

Хронично болните да останат дома: Загадениот воздух ја преполни Пулмологија, алармира директорот Зафировски

Надлежните институции апелираат граѓаните да ги почитуваат препораките и да го ограничат престојот на отворено, особено во утринските и вечерните часови, кога загадувањето на воздухот е најизразено.