Кандидатурите на Трајче Митев кој настапува како независен, Лазар Наумов од ТМРО и Сашко Николов од СДСМ се досега пристигнатите во Општинската изборна единица (ОИК) во Штип за вонредните локални избори во Градот под Исар по трансферот на Благоја Бочварски на челната позиција во Министерството за транспорт и врски. Рокот за аплицирање истекува утре на полноќ.

– Рокот за доставување на кандидатурите за избор на градоначалник на Општина Штип истекува утре на полноќ. Општинската изборна комисија е отворена и ќе имаме дежурна екипа, која ќе ги чека оние кои сакаат да се кандидираат, вели Сенка Андреева, претседателката на ОИК Штип.

Од Општинскиот комитет на ВМРО-ДПМНЕ велат дека утре ќе имаат нов состанок на Извршниот комитет. Тие јавно побараа да се одложат изборите за градоначалник на Штип и на Пласница поради актуелната состојба со коронавирусот. На состанокот ќе ги разгледат сите опции и како што велат внимателно ќе донесат одлука.

Изборите за градоначалник во Штип и Пласница треба да се одржат на 13 декември, а вториот изборен круг е на неколку дена пред Нова година, односно на 27 декември. Граѓаните ќе гласаат според здравствените протоколи, кои важеа и за предвремените парламентарни избори во јули.