Јануарската програма во Кинотеката се заокружува со проекција на антологиското ремек-дело „Небото над Берлин“ (Германија / Франција, 1987, 127 мин., црно-бел / колор) на Вим Вендерс, филм што и по децении останува непресушен извор на инспирација, поетски запис за човечката осаменост, љубовта и духовната потрага по смисла.

Неговото прикажување на 30 јануари, во 20 часот, во рамките на јубилејната година на Кинотеката има и дополнителна симболичка тежина, потсетувајќи на континуитетот на филмската уметност и нејзината моќ да опстои над времето.

Двајца ангели, Дејмиел и Касиел, скитаат низ улиците на Берлин, набљудувајќи ги раздвижените жители. Тие можат да ги слушнат мислите – стравовите, надежите и соништата на сите смртници што живеат долу. Ангелите им праќаат невидливи знаци на надеж, но никогаш не комуницираат со нив.

Кога Дејмиел се вљубува во осамената трапезистка Мерион, тој е спремен да се откаже од својата бесмртност. Копнее да го доживее животот во физичкиот свет и открива дека е можно тој да добие човечки облик.

Филмот „Небото над Берлин“ е една од најубавите градски кинематографски симфонии, воопшто. Снимен непосредно пред падот на Берлинскиот ѕид, оваа прекрасна таписерија од звуци и слики, снимена во црно-бело и во боја од легендарниот Анри Алекан, го доловува духот на времето и засекогаш го направи името на режисерот Вим Вендерс синоним за филмска уметност.

Филмот е снимен по сценарио на Вим Вендерс, Петер Хандке и Ричард Рајтингер, а во главните улоги играат Бруно Ганц, Солвег Домартин и Ото Сандер.