Го знаете Трајче Толевски алијас Мајка?! Е, кој, де, не го знае Мајка. Музичарот од групата „Три Шешира“, од пред две ипол години, е сопственик на ресторанот „Камин Кама“, лоциран во населбата Ѓорче Петров. Како што вели Мајка, ресторанот е „три во едно“, односно – има сопствен паркинг простор, има две тераси, реквизити за деца и големо игралиште, а има и одлична забава, особено кога настапува самиот сопственик. Е, тогаш, игла нема кај да падне!

Што да јадете? Скара и македонски специјалитети во тава. Тавите се прават по желба на гостите и на „лице место“, а кралица на скарата е веќе прославената Камин Кама плескавица. За неа стомакот дефинитивно треба да ви биде поголем од очите.

Што јадевме ние? Селско месо – со пилешко, мелено и свинско – и со зеленчук во тава.

Кога ќе бидете тука, не ги пропуштајте ни пржените тиквички за предјадење, а од пинџурот однапред нарачајте си дупла доза.

Во видеото проверете што има Мајка да ви каже.