Во бриселската населба Форест, минатото лето во подрум во куќа пронајден е скелет на македонскиот државјанин Реџеп Рахамановски, кој се води како исчезнат од 2003 година, соопшти белгиската Федерална полиција.

Скелетот, како што соопшти полицијата, бил пронајден при реновирање на куќата во јули 2025 година, по што е предаден на форензичка анализа.

По анализа, утврдено е дека скелетот припаѓа на Рахмановски, роден во Македонија во 1976 година.

Рахмановски последен пат бил виден вечерта на 16 јули 2003 година, кога го напуштил своето работно место. Оттогаш му се губи секаква трага и сè до идентификацијата на неговиот скелет полицијата немала никави сознанија што се случило со него.

Полицијата информира дека врз основа на форензичкиот наод е издаден налог за претрес на куќата со надеж дека ќе се добијат повеќе информации за тоа што се случило со жртвата.

Белгиската полицијата воедно бара евентуални сведоци или некој што ќе може да даде какви било информации за Рахмановски или за неговото исчезнување.

Во соопштението на полицијата се нагласува дека со секоја доставена информација ќе се постапува „дискретно“.