Во алманахот „Власите и Скопје“ од Марија Неделковска се опфатени историски процеси на Власите кои се доселиле во Скопје
Неодамна од печат излезе алманахот „Власите и Скопје“ од младата авторка Марија Неделковска. Станува збор за двојазичното книжевно дело (на македонски и на влашки јазик), прво од ваков вид кај нас во кој се опфатени одредени процеси на Власите кои се доселуваат во Скопје.
Авторка на текстот е Марија Неделковска, а преводот на влашки јазик е на Мирјана Јана Николовска – Неделковска.
Aлманахот претставува краток приказ на одредени историски процеси на Власите, животни премрежја низ кои поминале, на потеклото и занимањето, на првите пишани извори за доселувањето во Скопје и скопско, особено во периодот по Илинденското востание, како и на автентичните национални симболи.
Сточарството како основно занимање, а подоцна и трговијата, биле дополнителна причина Власите да бидат раселени и во голема мера да учествуваат во градењето на чаршијата во повеќето градови низ Балканот и пошироко. Власите на Скопје му дале еден друг лик развивајќи ги трите стопански гранки – занаетчиството, трговијата и транспортот.
Покрај времето кое засекогаш изминало, во еден дел, авторката се осврнува и на дел од денешницата. Објавата на алманахот „Власите и Скопје“ е финансиски поддржана од Советот на Град Скопје, кој овозможи двојазичната книга да ја види светлината на денот и на тој начин даде потврда дека го негува мултијазичниот и мултикултурниот аспект на градот.
(Текстот е објавен во „Културен печат“ број 219, во печатеното издание на весникот „Слободен печат“ на 24-25.02.2024)