ВМРО-Народна партија бара Македонците да се заштитат од мајоризација во тетовската општина
Советничката листа на ВМРО Народна партија за Општина Тетово денеска побара поддршка од ВМРО ДПМНЕ и од Социјалдемократскиот сојуз за потпишување декларација кој би ги штитела Македонците од мајоризација во локалната самоуправа, пишува Полошки глас.
Од партијата велат дека ова е последен обид да се издејствува етнички Македонец да биде претседател на Советот на Општина Тетово.
„Предлогот е едноставен: партиите кои во недела ќе освојат советнички мандати, да не учествуваат во конституирањето на новиот општински совет, доколку за претседател на Советот не биде избран советник од победничката македонска партија“, вели Драган Давидовски од ВМРО-НП Тетово.
Давидовски ги повика првите луѓе на локалните ограноци на ВМРО-ДПМНЕ и СДСМ „да се одважат и да издејствуваат согласност од нивните централни раководства“ за декларацијата.