Српскиот тенисер Новак Ѓоковиќ го освои 101. трофеј во својата блескава кариера, откако на турнирот во сала во Атина го совлада Италијанецот Лоренцо Музети, деветти на АТП-листата, со резултат 4:6, 6:3, 7:5. Со оваа победа, 38-годишниот Ѓоковиќ стана највозрасниот шампион во историјата на АТП-турнирите, кои официјално постојат од 1990 година.

По триумфот во Атина, Ѓоковиќ доби бројни честитки од колеги, пријатели и обожаватели ширум светот, а меѓу нив се најде и една особено забележителна – од холивудскиот актер Вин Дизел.

Ѕвездата на филмскиот серијал „Брзи и бесни“ (Fast and Furious) објави фотографија со Ѓоковиќ на својот инстаграм-профил и напиша: „Честитки за мојот брат Новак Ѓоковиќ. Величината не се добива така лесно – таа се заслужува со дисциплина и се дефинира со срце. Ти го поседуваш и едното и другото“.

На објавата реагира и сопругата на тенисерот, Јелена Ѓоковиќ, која остави емотикони со срце и српско знаме.