Кикбоксот е спорт кој комбинира елементи од бокс и различни боречки вештини, создавајќи интензивен и динамичен начин на тренинг кој развива не само физичка сила, туку и ментална цврстина.

Во серијалот на „Слободен печат“ зборувавме со Стефани Тодорова, третата најдобра кикбоксерка во светот, посветена мајка и мотивациски лидер.

Со својата посветеност и храброст, таа за вовед во интервјуто кое повеќе го насочивме кон жените, ни објасни дека оваа дисциплина не е само за мажи, туку и за жени кои сакаат да ја истражат својата физичка и ментална сила.

Нејзината приказна со спортот започнала кога имала четири години со гимнастика.
Веќе две години професионално тренира кикбокс и докажува дека една жена може да верува во себе и да стане трета кикбоксерка во светот, што е уште поголем резултат кој самата пред себе си го поставила како предизвик, и општо и на светски рангови.

– Го сменив спортот, пробав кикбокс, на вториот тренинг излегов и реков: „Сакам да бидам прва во Европа“. Тоа ми беше целта – вели Тодорова за „Слободен печат“.

Како тренер и мотивациски лидер, таа ги охрабрува жените да се надминат себеси, да ги прекинат стереотипите и да ги освојат своите цели.

– Интересот кај жените за овој спорт, и по резултати, и општо како интерес, опстојува на многу високо ниво, што кај мене, како жена, претставува огромно задоволство – oбјаснува Тодорова.

Секој тренинг и натпревар претставуваат тест на личните граници и сила на волјата која ќе резултира со здраво тело и здрав дух.

– И што е најважно, ќе имаме здрава нација,  здрави жени, девојки, кои понатаму ќе бидат уште посилни и похрабри мајки – вели Тодорова за „Слободен печат“.

Нејзината идна цел е да работи со деца со посебни потреби, особено со самоохрани мајки, кои се соочуваат со предизвици на многу фронтови.

– Едно нешто што ми е моментално цел во понатамошниот период е да работам со деца кои навистина имаат потреба од тоа. Со самохрани мајки, коишто навистина не можат и да работат и да внимаваат на детето, и на физичкиот раст, и на психичкиот раст – објаснува таа.

Стефани ни раскажа дека повеќето луѓе и жени го перципираат кикбоксот како агресивен. А таа ни го докажува обратното. Интервјуто за „Слободен печат“ го заврши со една мотивациска порака која вели:

– Ако вежбаш, ако се надградуваш, учиш секојдневно. А тоа е можно само ако се сакаш себеси.