Постојат имиња што не се само дел од нашата музичка историја, туку тие се таа историја. Едно од тие имиња е Бодан Арсовски, кој не е само басист. Тој е сведоштво и темел. Повеќе од четири децении, низ звукот на неговата бас-гитара тече звукот на една култура која се бореше да биде своја, иновативна, поинаква и непокорна. Како коосновач на легендарната група „Леб и сол“, Арсовски активно учествуваше во создавање на музичка естетика што ја надмина сцената и влезе во колективното сеќавање.

Бендот што без страв ги спои традиционалните македонски ритми со џез, прогресивен рок и фанк во време кога тоа звучеше како утопија, повторно се враќа кон своите корени, како што и самиот Бодан изјави во ексклузивното интервју за „Слободен печат“.

Заедно со своите колеги и другари од бендот и нивната свежа изведувачка енергија, токму деновиве тие ја споделија својата безвременска музика со публиката надвор од Македонија, на мини-турнеја низ Хрватска и Босна и Херцеговина, каде што повторно наидоа на топол прием и полни срца.

– И во Шибеник и во Сараево не сме биле 12 години. И тие навистина беа жедни за нас. Ми се допадна тоа што имав можност да видам како луѓето живеат таму, која е разликата помеѓу поранешното и сегашното мое видување на тие места. И морам да ви кажам дека видов многу среќни, насмеани луѓе. Тоа ме израдува. Чувствувам дека кај нас го нема тоа толку многу – вели Бодан.

Во ова интервју Бодан зборува за искуството кое му буди чувство на неверојатна сигурност и леснотија во секој отсвирен тон. За тоа како да останеш верен на себе во музичкиот свет полн со компромиси и како конекцијата со публиката во целиот регион им буди нова и инспиративна енергија.

– „Леб и сол“ е многу добар бенд. Мислам дека оваа постава е на патот да биде една од најдобрите постави на „Леб и сол“, иако се знае кои го формираа бендот. Меѓутоа, толку добро е расвирен и толку позитивна енергија има во бендот, што тоа публиката го чувствува, а тоа на нас ни дава сигурност дека кога ќе настапиме на сцена ќе ги освоиме. Јас на концертите нагласувам во кој период на кариерата на „Леб и сол“ припаѓаат песните кои ги свириме. Така почнувам од 1977, првиот албум, па вториот албум и за секоја песна имам некоја приказна да кажам, а тоа публиката сака да го слуша, и полека-полека се „навлекуваат“ на тоа како се развивал бендот. И на музиката, и на бендот, и на она што ние денес го свириме како новите „Леб и сол“. Со новиот материјал, тоа добива една комплетна слика за целата суштина на овој бенд. И на крајот, навистина, завршуваме доста еуфорично. Луѓето стануваат на нозе, аплаудираат. Чувствувам задоволство кога свириме, затоа што знаеме да им отсвириме токму тоа што сакаат да го чујат во тој момент – раскажува Бодан за нивните концерти.

За тоа како ги доживува публиката во Босна и Херцеговина, пишуваат и локалните медиуми, меѓу кои и „Кликс.ба“, кои за нашите „Леб и сол“ напишаа:
– Со комбинација од рок, џез и етничка македонска музика, оваа група ѝ подари на публиката незаборавна вечер со доза на носталгија. Инаку, рок-групата „Леб и сол“ е основана во Скопје во 1976 година. Оваа група беше една од најпопуларните групи во поранешна Југославија, а преку своите музички достигнувања комбинира елементи на рок, џез и етничка македонска музика. Како што бендот созреваше, влијанијата од џезот стануваа помалку очигледни. Сепак, на концертите, групата изведуваше џез композиции и долги верзии на традиционални етно-фолк класици како што се „Јовано Јованке“ или „Абер дојде Донке“, кои беа дочекани со голем ентузијазам и одушевување.