На еден месец сме пред Нова година. Традиционално се очекуваат попусти. Денес е Црн петок. Во анкетата што ја спроведе „Слободен печат“  ги прашавме анкетираните што мислат за реалните цени на производите и дали планираат да пазарат на овој ден.

– Нешто многу минимално има на намаление, ама „Блек фрајдеј“, како што треба да биде, нема кај нас – вели еден случаен минувач.

Повеќето од граѓаните беа информирани за Црниот петок, но не беа премногу заинтересирани за шопинг, велејќи дека тоа се само „маркетиншки“ трикови и дека ова е американска традиција.

– Со оглед на сè, ова се големи маркетиншки стратегии – објаснува еден млад минувач за „Слободен печат“.

Наидовме на една постара госпоѓа која живеела 10 години во Америка. Таа ни ја потврди драстичната разлика меѓу цените во Америка и во Македонија. Додаде дека македонските граѓани „паѓаат“ на вакви попусти, дури и да се минимални.

– Знаеш каков народ сме ние. Да ни кажат дека некаде нешто е 5 денари поевтино, таму ќе одиме. Ние сме такви – објаснува таа за „Слободен печат“.