Вупи Голдберг ги негира наводните врски со Џефри Епстин, откако нејзиното име се појави во документите поврзани со случајот на покојниот осуден сексуален престапник Џефри Епстин.

Во емисијата „Д вју“, емитувана вчера, 70-годишната водителка и актерка отворено зборуваше за фактот што нејзиното име се наоѓа во таканаречените „Епстин документи“, кои ги објави Министерството за правда на САД.

„Во име на транспарентноста – да, моето име е во документите. И што пишува таму? Пишува: ‘На Вупи ѝ треба авион за да оди во Монако. Хуманитарната организација на Џон Ленон, всушност треба да стои Џулијан Ленон, ќе го плати летот’“, објасни Голдберг во разговор со водителките Џој Бехар, Сани Хостин и Сара Хејнс.

Таа појасни дека станувало збор за обид да се организира приватен лет до хуманитарен настан, при што организаторите контактирале сопственици на приватни авиони.

„Тие ги доставуваат сите информации и прашуваат: ‘Дали сакате да го понудите вашиот G2?’“, рече таа.

Сани Хостин се вмеша со коментар дека, според документите, одговорот бил негативен, на што Џој Бехар додаде: „Со други зборови, секој може да се најде на оваа листа“.

„Токму тоа е мојата поента. Луѓето се обидуваат да ме претстават како да сум била негова девојка или пријателка. Не бев ниту едното, ниту другото“, возврати Голдберг.

Таа нагласи дека порано јавните обвинувања морале да бидат поткрепени со факти.

„Порано требаше да имате факти пред да кажете нешто“, истакна таа.

Во текот на разговорот беше спомнат и поранешниот американски претседател Доналд Трамп и неговото наводно појавување во документите. Голдберг одби да коментира за него, нагласувајќи дека зборува исклучиво за себе: „Мене ме влечат во ова. Луѓето навистина веруваат дека сум била со него. Ајде, ве молам. Секој маж со кој сум била бил познат во јавноста“.

Таа додаде и дека никогаш не се качила во спорниот авион.

„Знаете што би требало да направам за да се качам во авион? Да летам“, рече таа, алудирајќи на нејзиниот добро познат страв од летање.

Ова не е првпат Голдберг да ги демантира наводите за каква било поврзаност со Епстин. Во јануари 2024 година, исто така во „Д вју“, таа ги отфрли шпекулациите дека некогаш ја посетила неговата озлогласена приватна островска резиденција, велејќи: „Јас никаде не одам“.

Дискусијата доаѓа неколку дена откако јавниот обвинител на САД, Пем Бонди, испрати писмо до Конгресот во кое информираше дека Министерството за правда ги објавило сите документи што биле наложени со Законот за транспарентност во случајот „Епстин“.

Сепак, дел од преживеаните жртви и одредени членови на Конгресот ја доведоа во прашање целосноста на објавените материјали, укажувајќи дека некои документи биле силно цензурирани, а други накратко се појавиле па биле отстранети од веб-страницата.

Конгресменот од Мериленд, Џејми Раскин, изјави дека Министерството за правда со месеци се однесувало како да прикрива информации и дека документите можеле да бидат објавени многу порано.

ГАЛЕРИЈА: Досега непозната и морничава приказна за Џефри Епстин, раскажана од фотограф