Голема драма се одвиваше за време на денешните протести во Сараево, кои избија поради стравичната трамвајска несреќа што ја потресе Босна и Херцеговина, објави „Дневни аваз“.

Имено, кога демонстрантите стигнале до Алипашината џамија, еден маж со автомобил тргнал кон насобраните граѓани.

Со брзата интервенција на полицијата била избегната трагедија, возачот бил легитимиран, а потоа уапсен. Кај него била пронајдена дрога.

Веќе шести ден по ред граѓаните протестираат во Сараево, а студентите бараат објавување на снимката од моментот на несреќата.

Стар трамвај, возило што со децении се движело по истите шини, во четвртокот излета од колосек и ја покоси постојката. Во несреќата загина 23-годишно момче, уште помлада девојка остана без нога, а има и други повредени.

Граѓаните се собраа на протест кај Националниот музеј на Босна и Херцеговина, каде што студентите и средношколците побараа целосна и транспарентна информација за истрагата, вклучително и податоци за сервисирањето на трамваите и видеоснимка од камерата што го регистрирала трамвајот во моментот на несреќата.

Демонстрантите бараат и оставки од сите одговорни во целиот синџир на системот за јавен превоз, како и воспоставување квалитетен и безбеден јавен превоз и целосно запирање на приватизацијата во овој сектор.

ВИДЕО | Протести го тресат Сараево: граѓаните ја бараат снимката од трамвајската несреќа