Благодарение на сопствените знаења и способности, многу жени изградија вистински империи, а сега уживаат во статусот на највлијателните и најмоќните жени во светот.

Најмоќната Србинка на светот, поранешна агентка на ЦИА, милионерка од листата на „Форбс“, жена која го задржала моминското презиме и во двата брака… Таа е Фиби Новаковиќ.

Денес таа раководи со моќна компанија која е меѓу најголемите производители на одбранбена технологија за американската влада. На листата на „Форбс“ на жени кои сами го создале тоа што го имаат, таа е на 88-то место, со 290 милиони долари и на 30-тото место на листата на најмоќни жени во светот, исто така според „Форбс“.

Таа е претседател и извршен директор на одбранбениот гигант „Џенерал Динамикс“, а на оваа функција ѝ претходеше искуство на уште неколку важни позиции – таа е поранешен оперативец на ЦИА, а била и ангажирана во Министерството за одбрана на САД од 1997 до 2001 година.

Таткото на Фиби бил српски имигрант кој дошол на американско тло кога имал само 17 години и имал 50 долари во џебот. Но, како и многумина, тој успеал да го оствари американскиот сон. Тој станал воен пилот, а подоцна и разузнавач во воздухопловните сили на САД. Од нејзиниот татко Фиби ја наследила страста за нејзината работа, а тој ја насочил кон кариера во одбранбената технологија.

„Уште од мала бев свесна за можностите што ги нуди оваа земја и затоа навистина верувам во служење на нацијата“, изјавила тогаш таа.

Во едно од ретките интервјуа кои ги дала, таа открива дека родителите ја воспитале да ја чува нејзината гордост и дека најважно е да биде добра личност. Таа била мажена двапати и има три деца.