Најдобриот македонски каратист, Емил Павлов го освои сребрениот медал на Светското карате првенство во Дубаи, откако во финалето загуби од олимпискиот шампион Стивен Да Коста од Франција со 0:8.

И покрај поразот во финалето во категоријата до 67 килограми, Павлов го оствари најголемиот успех за Македонија на светските првенства, освојувајќи го сребрениот медал, а воедно по втор пат ја искачи Македонија на победничкиот пиедестал.

Претходно, Жарко Ристовски во 2010 година на СП во Белград го освои бронзениот медал ѝ и го донесе првиот медал на Македонија.

На СП кое се одржува во Дубаи, Павлов на патот до финалето ги победуваше Хомола од Словачка, Узбекистанецот Сајматов, Хамат од Јордан, Елксави од Египет и Унгарецот Тадиси. Во финалето непремостлива пречка беше Французинот Да Коста кој е и олимписки шампион.

Емил е двократен европски првак, триумфира на ЕП во Тампере 2014 година и во Нови Сад 2018 година, а има и два бронзени медали од ЕП во Монпелје 2016 и од ЕП во Гвадалахара 2019 година.

Резултатите на Павлов на СП во Дубаи:
Павлов –Хомола (Словачка) 4:3
Павлов –Сајматов (Узбекистан) 3:0
Павлов –Хамат (Јордан) 3:1
Павлов – Елксави (Египет) 4:1
Павлов – Тадиси (Унгарија) 3:3
Павлов –Да Коста (Франција) 0:8