Големото дерби во групната фаза во Лигата на шампионите му припадна на Манчестер сити кој со 2:1 го совлада ПСЖ во петтото коло и со тоа му се реваншира за поразот од 0:2 во второто коло.

Со победата над големиот ривал, Манчестер сити го обезбеди првото место во групата А бидејќи на едно коло до крајот на групната фаза има 12 бода, четири повеќе од ПСЖ.

Резултатот го отвори Килијан Мбапе со голот во 50 минута, но „граѓаните“ преку Рахим Стерлинг  во 63 и Габриел Жесус во 76 минута постигнаа два гола и дојдоа до победата.

Реал Мадрид му се реваншира на Шериф Тираспол за поразот во Мадрид и како гостин славеше со 0:3 и го „однесе“ Интер во нокаут-фазата.
„Кралевите“ поведоа во 30 минута со голот на Давид Алаба од слободен удар, а во финишот од првиот дел Тони Крос зголеми на 0:2.
Победата ја завери Карим Бензема во 55 минута и го искачи својот тим на првото место на табелата со 12 бода, два повеќе од Интер.
Македонскиот репрезентативец Бобан Николов влезе во игра во 59 минута, откако неговиот Шериф веќе губеше со 0:3.

Фудбалерите на Милан славеа на гостувањето кај Атлетико Мадрид со 0:1 и се замеша во трката за освојување на второто место на табелата во групата Б. Стрелец на единствениот гол беше Месиас кој во првиот допир со топката како играч на Милан постигна гол во 87 минута.
Ливерпул пак дојде и до петтата победа во петтиот натпревар во ЛШ откако со 2:0 го совлада Порто.

Резултати:

Група А
Манчестер сити – ПСЖ 2:1
Бриж – Лајпциг 0:5
Табела: Манчестер сити 12, ПСЖ 8, Лајпциг 4, Бриж 3.

Група Б
Ливерпул – Порто 2:0
Атлетико М. – Милан 0:1
Табела: Ливерпул 15, Порто 5, Милан 4, Атлетико Мадрид 4.

Група Ц
Бешикташ – Ајакс 1:2
Спортинг – Борусија Д. 3:1
Табела: Ајакс 15, Спортинг 9, Борусија 6, Бешикташ 0.

Група Д
Интер – Шахтјор 2:0
Шериф – Реал М 0:3
Табела: Реал М. 12, Интер 10, Шериф 6, Шахтјор 1.