Познатиот англиски готвач Гордон Ремзи е познат по одличните рецепти, а неговите ресторани се наградени со дури 17 Мишелин ѕвезди. Неговиот препознатлив ресторан, ресторанот „Гордон Ремзи“ во Челзи, Лондон, има 3 Мишелин ѕвезди од 2001 година. Покрај кулинарската работа, како и телевизиските емисии, познатиот готвач има и свој канал на Јутјуб, каде што покажува како од основни намирници да ги направите најубавите јадења.
За веганите предлагаме да го пробаат овој рецепт, а во прашање се шницли од карфиол во прекрасен сос. Љубителите на карфиолот ќе бидат воодушевени од рецептот, а неговата подготовка не бара посебни кулинарски вештини.

Состојки:

– 1 карфиол
– 1 кромид
– 3-4 чешниња лук
– прстофат ким
– мирудија
– нане
– магдонос
– 50 г путер
– 1 лажица сенф
– прстофат излупени бадеми во ливчиња
– 2 лажици сок од лимон
– 1 шолја кафе вода или бујон
– 1 лажица кафеав шеќер
– 2 лажици балсамико оцет
– 1 ловоров лист
– 30-40 мл маслиново масло

Подготовка:

Карфиолот исечкајте го на шницли, а додека тоа го правите, загрејте ја тавата и додајте малку масло во неа. Во тавата ставете една шницла од карфиол, па посолете и побиберете. Исчистете го и сплескајте го лукот, а потоа додајте ги чешнињата во тавата.
По неколку минути, додајте поголемо парче путер и сипете сок од лимон. Кога ќе добие боја на долната страна, свртете го карфиолот и налејте малку вода или бујон. Кога ќе почне да врие, покријте го.

Додека карфиолот се пече, загрејте друга тава и во неа додајте прстофат ким и ливчиња бадем. Кога зачините ќе се потпечат, тргнете ги од шпоретот. Во сад измешајте го ситно исечканиот виолетов кромид, па додајте сечкан магдонос, копар и нане. Зачинете со сол и бибер, а потоа сипете сенф, балсамико и маслиново масло. Добро измешајте. Додајте кафеав шеќер, тостираните зачини (бадеми и ким) и повторно измешајте. Потоа додајте уште малку сув зачин по желба и сосот е готов.

Во карфиолот додајте уште малку путер и ловоров лист. Кога путерот ќе се растопи, неколкупати прелијте го карфиолот и исклучете го шпоретот. Карфиолот ставете го во чинија и уште неколкупати прелијте го со сосот во тавата, а потоа врз зеленчукот сипете го и сосот што сами сте го направиле.