Поранешниот фудбалер на Ливерпул и белгиската репрезентација, Дивок Ориги, официјално стави крај на својата професионална кариера.

Најголемиот белег во кариерата Ориги го остави во дресот на Ливерпул, каде на 175 натпревари постигна 41 гол и беше дел од генерацијата која ги освои Премиер лигата, Лигата на шампионите и ФА Купот.

Покрај настапите за англискиот гигант, белгискиот напаѓач играше и за Лил, Волфсбург, Милан и Нотингем Форест, додека за националниот тим на Белгија запиша 32 настапи и три погодоци.

Ориги засекогаш ќе остане запаметен меѓу навивачите на Ливерпул и по историскиот полуфинален реванш против Барселона во Лигата на шампионите во 2019 година. Тогаш, по брзо изведениот корнер на Трент Александер-Арнолд го постигна четвртиот гол за победа од 4:0, со која „црвените“ го надополнија поразот од 3:0 од првиот натпревар и изборија место во финалето.