Арсенал направи чекор наназад во трката за шампионската титула во Премиер лигата, откако на гостувањето кај Брентфорд одигра 1-1 и испушти вредни бодови. Во натпревар со малку вистински возбудувања во првото полувреме, сите клучни моменти се случија по паузата.

По тврд и борбен старт на вториот дел, „топчиите“ дојдоа во водство во 61. минута. По изведен аут, топката повторно стигна до Пјеро Хинкапиe, кој центрираше прецизно, а Нони Мадуеке одлично се снајде во скок и со удар со глава ја затресе мрежата за 0-1.

Сепак, домаќините не се предадоа. Брентфорд возврати десет минути подоцна, кога Ван ден Берг асистираше до Луис-Потер, а овој рутински реализираше за израмнување на 1-1.

Во финишот натпреварот доби на интензитет. Во 88. минута Брентфорд беше на чекор до целосен пресврт, но Москера во последен момент го стигна Тијаго, кој излегуваше сам пред голот на Раја, и со одличен старт спречи сигурен погодок. Арсенал имаше голема шанса во судиското надополнување. Тимбер го проигра Мартинели во 93. минута, но бразилскиот напаѓач беше запрен од извонредната интервенција на голманот Келехер.