ВИДЕО: Путин и Лукашенко пак се договараа како да се обединат Русија и Белорусија
Рускиот лидер Владимир Путин денеска го пречека неговиот белоруски колега и долгогодишен сојузник, Александар Лукашенко во Кремљ, а тема на нивните разговори било понатамошното обединување на Русија и Белорусија во унија, кое начелно беше договорено уште во 1999 година.
На средбата, која им претходи на големи заеднички воени вежби на армиите на двете земји, не биле потпишани нови меѓудржавни документи, а двајцата лидери се задржале на темите на економската и административната интеграција, соопшти Кремљ.
На заедничката прес-конференција по средбата, Путин изјави дека се интересирал за тоа до каде е напредокот на програмата за создавање на унијата од белоруска страна.
„Се движиме напред како цивилизирани земји, само заедно, само како унија – речиси еден единствен народ“, рече Лукашенко. Но, тој додаде дека сѐ уште нема конкретен договор, кој се очекува најрано во октомври или подоцна, откако ќе се одржат серија нови меѓувладини консултации.
Путин, од своја страна, најави нови заеми за Белорусија, земја што е во речиси целосна меѓународна изолација поради прогонот врз опозицијата и недемократското владеење на Лукашенко.
„Најпрвин мораме да ја поставиме економската подлога, пред да продолжиме по политичката патека“, изјави рускиот лидер по средбата.