Дербито на францускиот фудбал меѓу ПСЖ и Марсеј, одиграно вечерва во Париз, мина во целосна доминација на домашниот тим, кој со убедливи 5-0 го декласираше големиот ривал.

Марсеј немаше решение за разиграниот ПСЖ, кој од првата до последната минута ја контролираше играта и сосема заслужено стигна до висока победа. Парижаните рано го отворија резултатот, кога во 12. минута Осман Дембеле ја затресе мрежата за 1-0, а истиот играч повторно се запиша меѓу стрелците во 37. минута, зголемувајќи на 2-0, резултат со кој заврши првото полувреме.

Во продолжението следуваше целосен распад на гостите. Во период од само десет минути, од 64. до 74. минута, ПСЖ постигна уште три гола. Медина несреќно ја погоди сопствената мрежа, а потоа прецизни беа и Кварацхелија и Ли Канг-ин, со што беше заокружена убедливата и понижувачка победа на парижаните.