Некој ги погледнал најголемите крузери во светот и решил дека тие едноставно не се доволно амбициозни, затоа што проектот „Фридом шип“  би можел целосно да ги надмине сите досегашни рекорди.

Овој крузер, замислен како првиот вистински пловечки град во светот и долг околу 1,6 километри, е дизајниран да превезува до 80.000 жители, посетители и членови на екипажот, додека непрекинато плови околу светот.

Метропола на море?

Наместо класичен крузер, неговите креатори го опишуваат како целосно функционална метропола на море, со училишта, паркови, хотели, болница, спортски објекти, банки, продавници и бројни други содржини.

Проектот првпат беше претставен кон крајот на 1990-тите години од компанијата „Фридом круз лајн интернешнл“, а доколку биде реализиран, ќе биде широк околу 244 метри, висок 30 палуби и тежок дури 2,3 милиони тони. Проценетата вредност на изградбата изнесува околу 14 милијарди евра.

Според плановите, бродот ќе користи нуклеарна енергија и ќе биде постојан дом за околу 50.000 жители. Покрај нив, на него ќе можат да престојуваат уште 10.000 посетители, додека за функционирањето ќе се грижат околу 20.000 членови на екипажот.

Каков би бил животот во нуклеарниот џин?

Она што најмногу фасцинира е содржината што ќе ја нуди пловечкиот град. Во него се предвидени спортски стадион со 15.000 седишта, два музеја, конгресен центар, симфониска сала и воден парк.

Жителите ќе имаат пристап до голем гастрономски центар на две нивоа, продавници, банки и ноќен клуб, а љубителите на нуркањето ќе можат да уживаат во специјален аквариум.

За посетителите ќе бидат изградени два високи хотела и осум хелиодроми, додека децата кои ќе живеат на бродот ќе посетуваат училишта што ќе нудат образование од основно до факултетско ниво.

Поради неговите огромни димензии, на бродот ќе функционира и трамвајски систем за превоз на патници. Ќе има повеќе од 24 километри пешачки патеки и речиси 12.000 квадратни метри зелени површини и паркови.

Вечно патување околу светот

Според концептот, „Фридом шип“ ќе го обиколува светот на секои две години со брзина од околу 13 километри на час. Бидејќи е премногу голем за да се закотви во кое било пристаниште, ќе останува во меѓународни води, а посетителите ќе пристигнуваат со траекти од најблиските пристаништа.

Компанијата од Флорида веќе работи на обезбедување средства за реализација на проектот. Извршниот директор Роџер Гуч изјавил дека интересот е огромен.

„Речиси би можеле да оправдаме изградба на три вакви брода“, изјавил тој за „Телеграф“.

Доколку се обезбеди финансирањето, изградбата ќе се одвива во Индонезија и би можела да трае до четири години. Планот предвидува првите жители да почнат да се вселуваат уште додека делови од бродот сè уште се доградуваат.

Ако некогаш исплови, „Фридом шип“ ќе стане најголемото пловило што човештвото некогаш го изградило – вистински град на вода кој никогаш нема да застане.

Погледнете како би изгледал: