Руската интерконтинентална балистичка ракета „Сармат“, позната и како „Сатана II“, доживеа уште еден неуспешен тест за нејзино лансирање. Хиперсоничната ракета, честопати опишувана како „најсмртоносното оружје на светот“ и способна да носи нуклеарни боеви глави, експлодираше и се урна само неколку секунди по полетувањето од полигонот Јасни во рускиот регион Оренбург, објавија странските медиуми.

The Sarmat ICBM had a failed launch. So much for Russia’s so-called wonder weapon. They’d end up blowing themselves up. pic.twitter.com/Pvbun7AYRq

— PaulC (@PaulConRO) November 29, 2025

Според достапните информации, „Сармат РС-28“ отстапил од својот курс, испуштајќи црни облаци од чад, пред огнените остатоци да се срушат на земјата. Ракетата паднала во близина на лансирната рампа, создавајќи огромна огнена топка и испуштајќи необичен виолетов чад во небото.

Ова е петтиот неуспешен тест лет на стратешката ракета, која предизвикува главоболки во Москва. Да потсетиме дека за време на претходниот тест во септември 2024 година, ракетата експлодираше во космодромот Плесецк, околу 800 километри северно од Москва, оставајќи зад себе огромен кратер.

И покрај ова, рускиот претседател Владимир Путин само пред неколку недели изрази надеж дека „Сармат“ ќе биде подготвен следната година, велејќи: „

Оваа година ќе го ставиме „Сармат“ на борбени тестови, а следната година ќе го распоредиме на борбена должност.“

Оружје дизајнирано за уништување

Ракетата е долга 35 метри, има дострел од речиси 18.000 километри и тежи повеќе од 208 тони. Дизајнирана е да носи повеќе нуклеарни боеви глави и да погодува цели во САД и Европа. Вјачеслав Володин, член на рускиот Совет за безбедност, претходно тврдеше дека ракетата може да го погоди Европскиот парламент во Стразбур за помалку од четири минути.

Иако нејзиното пуштање во употреба беше планирано за 2018 година, повторените неуспеси во тестирањето доведоа до бројни одложувања. До денес, само еден лет на системот „Сармат“ е оценет како делумно успешен.

Аналитичари: Нема сомнение дека е Сармат

Веб-страницата на украинскиот „Defense Express“ објави дека снимката речиси сигурно го прикажува Сатана II. Други аналитичари се согласуваат со таа проценка.

Павел Подвиг, истражувач на ОН и директор на Проектот за руски нуклеарни сили, за британски Телеграф изјави дека другите ракети практично можат да се исклучат.

„Всушност, тука постојат само две опции: постарата ракета SS-18, позната како Сатана I, или овој нов Сармат“, рече Подвиг. Што се однесува до постарата ракета, мислам дека е малку веројатно, бидејќи не е тестирана од 2013 година – додаде тој.

Подвиг додаде дека местото за тестирање на новата ракета е преместено од Плесецк во воздухопловната база Домбаровски во близина на Јасни откако силосот таму беше уништен во експлозија во 2024 година.

Аналитичарите тврдат дека сателитските снимки од последното неуспешно лансирање покажале дека ракетата паднала на нешто помалку од еден километар од нејзиниот силос и оставила кратер широк околу 70 метри.