Истражувањето на ново место за време на божиќните празници може да биде магично, со прекрасни декорации, вкусна храна, греено вино и лизгалишта. А Вилнус, главниот град на Литванија, беше прогласен за божиќна престолнина на Европа во 2025 година од страна на Мрежата на божиќни градови, пишува „Дејли мејл“.

Посебна предност на овој град е што не е преполн – само 1,2 милиони туристи го истражувале литванскиот главен град минатата година. Но, тоа не значи дека нема што да се види и доживее, особено во зима.

Со својата блескава елка, Стариот град, кој е под заштита на УНЕСКО, и пазарите полни со греано вино и рачно изработени производи, Вилнус нуди интимна празнична сезона.

Празничната сезона во Вилнус започнува на 29 ноември со најочекуваната традиција – осветлувањето на елката на плоштадот на катедралата.

Божиќниот пазар се отвора истата вечер, нудејќи им на посетителите регионални деликатеси – колачи како што се ќучиукаи, кои традиционално се јадат на Бадник, и шакоти во форма на елка, заедно со крофни со сирење, чадени колбаси и меденки…

Како и другите празнични пазари низ Европа, дрвените тезги се полни со ракотворби и подароци, а има и добротворен базар и лизгалиште за мраз.

Божиќната трка на 6 декември ги претвора градските улици во разиграна парада на Дедо Мразовци, џуџиња и креативно костимирани учесници. Врвот на сезоната е, секако, 31 декември, кога огномет, жива музика и прослави на отворено го осветлуваат главниот град, дочекувајќи ја Новата година.