Европското првенство во фудбалот ќе започне за пет дена, а во продолжение го објавуваме најстарото ривалство помеѓу Англија и Шкотска и нивниот дуел од ЕП 1996 година и легендарниот гол на Пол Гаскоњ.

На тој дуел во рамките од групната фаза на 15 јуни 1996 година Англичаните славеа со 2:0 со головите на Алан Ширер и Пол Гаскоњ.

ЕП во Англија беше првото големо меѓународно натпреварување кое е одржано во таа земја уште од Светското првенство во 1966 година.

Она што се случувало во тие подготовки денес е невозможно да се повтори, имајќи ја предвид технологијата и мобилните телефони. Никогаш нема да ја знаеме точната количина алкохол што ја конзумираше репрезентацијата на Англија, но сликите на Гаскоњ се најдоа во медиумите и предизвикаа вистинска бура меѓу љубителите на фудбалот.

On 15 June 1996, @England beat Scotland by 2-0 @wembleystadium. Remember this strike? #3Lions #18YearsAgo pic.twitter.com/jgRkqcTi9x

— England (@England) June 15, 2014

Англија поведе кога Алан Ширер со глава ја упати топката во мрежата во 53 минута. Пред тој погодок иницијативата беше на страната на Шкотска, која напаѓаше со сиот максимум, имаше и шанса да дојде до предност од пенал, но истиот не го реализираше Гери Мекалистер, кој шутираше добро, но одличниот Дејвид Симан го одбрани неговиот удар.

Фудбалска „магија“ се случи во 79 минута кога Гаскоњ мајсторски се ослободи од противничкиот играч и од „прва“ испрати неодбранлив удар во мрежата за голема радост на трибините.

Легендарниот Гаскоњ изведе невидена прослава лежејќи на грб додека неговите соиграчи го имитираа и истураа алкохол во устата имајќи предвид што правеа на подготовките пред шампионатот.

Не само што тоа беше еден од најдобрите голови на шампионатот, воедно Гаскоњ ја спои генијалноста со неговите пороци и грешки надвор од теренот.

Да додадеме уште дека на тој континентален собир Англија стигна до полуфиналето каде беше елиминирана од Германија на пенали. Во финалната битка за трофејот Германците триумфираа над Чешка со „златниот“ гол на Бирхоф.