На денешен ден во 1936 година роден е македонскиот диригент, композитор и великан на современата македонска музика – маестро Александар Џамбазов.

Во негова чест, син му Игор објави видео на својот инстаграм-профил на кое ја испеа песната „Срамежливи“, еден од хитовите на музичкиот фестивал „Скопје 68“.

Оваа песна што ја интерпретираа Виолета Томовска и Диме Поповски, а во друга верзија ја испеаја и Зафир Хаџиманов и Љупка Димитровска, беше наградена со прво место од публиката токму на Скопскиот фестивал во 1968 година.

– Здраво драги мои. Денес е 3 февруари. Денес татко ми Џамбаз ќе наполнеше 90 години. Ќе ми биде чест и големо задоволство да ви отсвирам песна од првиот Скопски фестивал, се вика „Срамежливи“ – кажа Игор.

 

View this post on Instagram

 

A post shared by Igor Djambazov (@igordzambazov)

Творечкиот опус на нашиот маестро Џамбазов беше многу богат. Тој беше автор на голем број детски песни, иницијатор и долгогодишен диригент на детскиот фестивал „Златно славејче“ во Скопје.

Во својата долгогодишна кариера, тој создаваше сценска и филмска музика, но создаде и повеќе дела од класичната музика, меѓу кои и „Рапсодија за Скопје“ за пијано и оркестар (1966), „Седум танцови варијации“ за пијано и оркестар (1977) и др. Ценетиот композитор напиша и повеќе хорски композиции, како и голем број популарни мелодии.

Александар Џамбазов беше добитник на повеќе од 40 награди и признанија во Македонија и Југославија, меѓу кои и државната награда „11 Октомври“ и наградата на Град Скопје „13 Ноември”.

Тој беше во брак со познатата македонска актерка Анче Џамбазова, со која ги добија синот Игор Џамбазов и ќерката Тања Џамбазова.

Џамбазов нè напушти пред четири години, на 25 јануари, на 85-годишна возраст.