Маја Морачанин, претседателка на партијата ДОМ, гостуваше во денешното издание на „Утрински брифинг“. ДОМ вчера објави дека ќе се воздржи од тоа да ги повика своите гласачи да гласаат за некого во вториот круг. Што значи тоа за владината коалиција оти Заев повика на обединување?

– Ние јасно кажавме уште пред почетокот на изборите рековме дека ние не располагаме со гласовите на граѓаните. Гласовите се нивни. Не е наше да повикуваме да гласаат за кого било. Ова нема да ја разниша владината коалиција. Ние јасно кажавме дека остануваме дел од владината коалиција. Ние со нашите тројца пратеници со ЛДП не се дел од никакво преструктуирање на парламентарното мнозинство и тоа се шпекулации. Јасно ја слушнавме и пораката и критиките од граѓаните. Тоа покажува дека сме биле во право кога рековме дека мора да направиме промени оти тоа го бараат граѓаните.

Секоја политичка партија е посебен политички субјект и нормално е секој да излезе сам на избори. Ние имаме своја програма и личности кои ќе ја спроведат таа програма и затоа излеговме заедно со ЛДП како движење а не со СДСМ. Задоволни сме со постигнатите резултати, 26 илјади гласови за нашите градоначалници не е малку, вели Морачанин.

Една од независните, Ана Петровска, претходно беше членка на ДОМ. Сега процентот гласови што го има Петровска е поголем од оној на вашиот кандидат. Оттука се покажа дека граѓаните сакаат личности како неа.

– Во политиката мора да сте искрен и чесен кон граѓаните. Не може едно да ветувате, а во институциите друго да правите. Таа потфрли во инспекторатот како директорка и тоа беше причина за нејзино разрешување по што таа излезе од партијата. Сега инспекторатот покажува одлични резултати. Ана Петровска имаше намера да го дискредитира ДОМ како партија и не ѝ успеа.

Велите дека ќе се залагате за промени. Што планирате со ЛДП?

– Договоривме по изборите сите да седнеме и да се договориме да се направат промени во начинот на функционирање и на локално и на централно ниво, да се забрзааат реформските процеси. Исто имаат влијание и неуспешните евроинтеграции за што ние немаме никаква вина, што предизвика не расположение кај граѓаните. Тие се жалат и на функционирањето на администрацијата. И СДСМ најави дека ја примиле пораката од граѓаните и треба да се дејствува во правец на брзо исполнување на нивните барања.

Целиот разговор проследете го во видеото во продолжение: