Кошаркарите на Сан Антонио изминатата вечер на домашен терен ја совладаа Минесота со убедливи 126:97 и поведоа со 3:2 во полуфиналната серија од плејофот на Западната конференција во НБА-лигата.

Најзаслужен за победата на Сан Антонио беше Виктор Вембањама, кој натпреварот го заврши со 27 поени, 17 скока, пет асистенции и три блокади. Одлична поддршка имаше и од Келдон Џонсон со 21 поен, Деарон Фокс со 18 и Стефон Касл со 17 поени.

Кај Минесота, Ентони Едвардс, кој во првото полувреме беше запрен на само осум поени, мечот го заврши со 20 поени. Џулиус Рендл и Џејден Мекдениелс постигнаа по 17 поени.

Сан Антонио во првото полувреме имаше и предност од 18 поени, но Минесота третата четвртина ја отвори со серија 14:2 и израмни на 61:61. Сепак, домашниот тим брзо ја врати контролата и до крајот на третата четвртина повторно стигна до плус 18 (91:73), по што во последниот период не дозволи пресврт.

Сега Сан Антонио е на само една победа од финалето на Западната конференција, каде веќе се пласира Оклахома, која со максимални 4:0 ги елиминира Лејкерси. Шестиот натпревар ќе се игра ноќта меѓу петок и сабота во Минеаполис.

ВИДЕО | Вемби исклучен по четири минути, Минесота израмни против Сан Антонио