Словенечкиот ас Лука Дончиќ повторно блескаше и ги водеше неговите Лејкерс до седмата победа во низа.

Дончиќ беше незапирлив и уфрли 34 поени во триумфот над Њу Орлеанс пеликанс со 133-121, а само во првата четвртина постигна импресивни 20 поени. Покрај тоа, запиша и 12 скока и седум асистенции, уште еднаш потврдувајќи ја својата феноменална форма.

Ова е 13. победа за Лејкерс во последните 15 натпревари. Поддршка за Дончиќ дадоа и Остин Ривс со 33 поени и осум асистенции, како и Деандре Ајтон кој придонесе со 22 поени и 12 скока. Леброн Џејмс беше надвор од составот поради оток на левото стапало, но неговото отсуство речиси и да не се забележа поради одличниот настап на Дончиќ.

Тој моментално е најдобар стрелец во НБА со просек од 35 поени по меч и четврти по асистенции со 9,2. Натпреварот против Пеликанс беше негов шести по ред со најмалку 30 поени. Лејкерс се искачија на второто место во Западната конференција со биланс 15-4, зад актуелниот шампион Оклахома сити тандер, која доминира со неверојатни 20-1. Калифорнискиот тим е убедлив и во НБА Купот, каде што го освои првото место во Групата Запад Б.

РЕЗУЛТАТИ
Кливленд – Бостон 115-117
Њујорк – Торонто 116-94
Филаделфија – Атланта 134-142
Портланд – Оклахома 115-123
Минесота – Сан Антонио 125-112
Сакраменто – Мемфис 107-115
ЛА Лејкерс – Њу Орлеанс 133-121

Преземено од: Спорт.ком.мк